នៅព្រឹកថ្ងៃទី ១៤ ខែវិច្ឆិកា ឆ្នាំ២០២៥ នេះ ក្រោមការចង្អុលបង្ហាញ និងបញ្ជាផ្ទាល់ពី ឯកឧត្តមអភិបាលខេត្តកណ្ដាល អាជ្ញាធរជំនាញបានបើកប្រតិបត្តិការចុះបង្ក្រាបបទល្មើសនេសាទខុសច្បាប់ទ្រង់ទ្រាយធំ នៅលើផ្ទៃទន្លេក្នុងភូមិសាស្ត្រខេត្តកណ្តាល ដើម្បីការពារ និងអភិរក្សធនធានជលផលនៅក្នុងរដូវបិទនេសាទ ឬរដូវត្រីពងកូន។
ប្រតិបត្តិការនេះត្រូវបានដឹកនាំអនុវត្តដោយផ្ទាល់ពី លោក ហេង សុភារិទ្ធិ នាយខណ្ឌរដ្ឋបាលជលផលខេត្តកណ្ដាល ដោយសហការជាមួយនឹងកម្លាំងចម្រុះជាច្រើនរូប មានដូចជា អាជ្ញាធរមូលដ្ឋាន កងកម្លាំងនគរបាល និងយោធាពាក់ព័ន្ធ។
យោងតាមរបាយការណ៍បឋមពីកម្លាំងប្រតិបត្តិការ បានបង្ហាញថា ការចុះបង្ក្រាបនេះផ្តោតជាសំខាន់ទៅលើការលុបបំបាត់ការប្រើប្រាស់ឧបករណ៍នេសាទខុសច្បាប់ ដែលបំផ្លាញធនធានត្រី ដូចជា៖
លូស្បៃមុង
របាំងព្រួលស្បៃមុង
ការនេសាទដោយប្រើឧបករណ៍ឆក់ ឬឧបករណ៍ហាមឃាត់ដទៃទៀត
ក្នុងអំឡុងពេលចុះបង្ក្រាប ក្រុមការងារបានធ្វើការរុះរើ និងដុតបំផ្លាញចោលនូវឧបករណ៍នេសាទខុសច្បាប់ជាច្រើនកន្លែងនៅនឹងកន្លែងកើតហេតុ។ ជាមួយគ្នានោះ ត្រីចម្រុះដែលចាប់បានដោយបទល្មើសទាំងនោះ ត្រូវបានចាក់លែងចូលទៅក្នុងបឹងធម្មជាតិ និងដងទន្លេវិញ។
ការបើកយុទ្ធនាការទ្រង់ទ្រាយធំពេលនេះ គឺជាការឆ្លើយតបទៅនឹងគោលនយោបាយរបស់រាជរដ្ឋាភិបាល និងជាការប្តេជ្ញាចិត្តរបស់រដ្ឋបាលខេត្ត ក្នុងការទប់ស្កាត់ឱ្យបាននូវបទល្មើសនេសាទ ដែលជាការគំរាមកំហែងដល់និរន្តរភាពនៃធនធានជលផលជាតិ។
ឯកឧត្តមអភិបាលខេត្តកណ្ដាល ក៏បានអំពាវនាវដល់បងប្អូនប្រជានេសាទទាំងអស់ សូមចូលរួមគោរពច្បាប់ស្តីពីជលផល និងបញ្ឈប់ជាបន្ទាន់រាល់សកម្មភាពនេសាទខុសច្បាប់គ្រប់ប្រភេទ ដើម្បីធានាថាធនធានត្រីនៅតែមានបរិបូរណ៍សម្រាប់កូនចៅជំនាន់ក្រោយ។ ឯកឧត្តមបានបញ្ជាក់ថា អាជ្ញាធរនឹងបន្តអនុវត្តវិធានការផ្លូវច្បាប់យ៉ាងតឹងរ៉ឹងចំពោះជនល្មើសណាដែលនៅតែបន្តប្រព្រឹត្តបទល្មើសទាំងនេះ។ 
